Колькі забірае ў нас дзяржава, а колькі застаецца нам

Каб вы зразумелі ў чым справа... Нейкі час таму я размаўляў з маім добрым знаёмым, былым генэральным дырэктарам польскай аўтамабільнай фабрыкі Daewoo-FSO. Гутарка датычылася часоў калі яны яшчэ рабілі польскі аўтамабіль - "Палянэз" (Polonez). Я яго запытаў, ці ведае ён, колькі складаюць падаткі ў рынкавай цане “Палянэзу”. Ён адказаў "Так, мы лічылі, атрымалася 50,6%". Я пытаюся: "А як вы лічылі, напрыклад, колы ці пакрышку кола?". Адказ: "Ну як... Кола гэта кола, а не падатак....". Кажу: "Не, не... Фірма вам прадае за 50 эўра не "кола" - значыцца шмат кампанэнтаў плюс праца - але таксама: падаткі плочаныя ад кола, падаткі плочаныя ад працаўнікоў, страхоўка працаўнікоў, падатак у энэргіі патрачанай пры прадукцыі кола"...

	цитата

дзяржава забірае ў нас 80% нашых заробкаў

Пасля ўсіх гэтых адлічэньняў атрымалася нам, што калі б не падаткі, "Палянэз" мог бы быць танейшы больш за 75%...

Зараз пераходзім да нашых падлікаў:

На самым пачатку скажу толькі, што памыліцца магу на +/- 5%.

Заробак у Менску складае прыкладна 300$ (зарабатак нэта, такзваны ”на руку”).

Сацыяльныя ўнёскі: 50%. Пэнсійны фонд, мэдычны, працоўны, чарнобыльскі фонды йгд. З нашых заробкаў забіраюць на будучую пэнсію - пра тое, якія пэнсіі, ўсе й бяз мяне ведаюць, дый пры нэгатыўным (мінусавым) натуральным прыросьце, баюся што наша пакаленьне нічога не атрымае, бо за нашыя пэнсіі ня будзе каму плаціць. Для тых, хто ня ведае: адбываецца так, што мы сёньня плоцім тым, хто зараз на пэнсіі, а за нас будуць плаціць нашыя дзеці й унукі. Забіраюць у фонд мэдычнага страхаваньня (цікава ці вы задаволеныя ўзроўнем лячэньня ў Беларусі?), на працоўныя фонды (пасобіе для абібокаў) і іншыя. Вартасьць унёскаў - 150$.

Падаходны падатак (20%) плоцім толькі ад працы 60$. Гэтыя грошы йдуць на ўсё іншае - на ільготныя квіткі для нашых дзяцей, на вучобу нашых дзяцей, якіх потым прымусова разьмяркоўваюць, пад прадлогам адпрацаваць тое, што ўжо адпрацавалі іх бацькі, і г.д.

Атрымоўваецца, што наш рэальны заробак (інакш кажучы - заробак брутто), столькі сколькі мы каштуем для нашага працадаўцы і што ён бы плаціў нам, калі б ня ўся гэтая дурасьць з падаткамі й унёскамі, гэта 300$ ("на руку") + 150$ (узносаў) + 60$ (падаткі) = 510$. Гэта наш кошт для нашага працадаўцы. Інакш кажучы, калі б не дзяржава, ён бы гэтыя грошы плаціў нам – а так... Розьніцу паміж 300$, а 510$ адчуць лёгка. Праўда?

Далей.

На алькаголь у сярэднім мы аддаем 30$ у месяц (клюбы, бары, лавачкі ў парку... йгд); акцыз у сярэднім 70% і іншыя падаткі накшталт падатку на дададзеную вартасьць (плюс 15-20%), глядзі выжэй апавяданьне пра "Палянэз": атрымоўваецца 90% = 27$ з таго што мы трацім на алкаголь, мы аддаем дзяржаве. Уявіце, прадпрымальнік, які дае працу людзям, зарабляе з нас толькі 3$ а рэшту ў 27$ забірае дзяржава й яшчэ жмецца на ільготы для студэнтаў і маленькіх дзетак.

Паліва: 50$; акцыз і іншыя падаткі, між іншым на дарогі – а вы бачылі ў тым жа Менску нармальныя дарогі? - 70% = 35$ аддаем дзяржаве.

Ежа, спажывецкія тавары: 150$; укрытыя ў іх падаткі, між іншым ПДВ, акцыз нават на гарбату – каля 35% = каля 53$ аддаем дзяржаве.

Жыльлё (газ, электрычнасьць і інш) каля 40% з таго што засталося; укрытыя ў іх падаткі: 45% = каля 14$ вядома куды...

Тавары й паслугі (вопратка, цырульнік і падобныя) - на гэта застаецца прыблізна 40$ - што на 80% складаюць падаткі яўныя й скрытыя. Прыклад скрытых падаткаў - ПДВ, які плоціцца па некалькі разоў: калі фабрыкі набываюць сыравіну для вытворчасьці сваіх тавараў, калі прадаюць яе гуртоўням, калі тыя прадаюць дыстрыб'ютарам, яны ў сваю чаргу да пунктаў продажы, крамаў, а апошня ў ланцужку гэта мы кліенты, набыўцы = 32$ (нам забіраюць і зноў-жа, на Рынак трапляе толькі 8$ з 40$)

Падсумуем. Атрымоўваецца, агулам мы плоцім (а заносяць гэта ў зубах да розных фондаў, падатковых устаноў ігд, у ролі бясплатных зборшчыкаў, вытворцы й прадпрымальнікі) 371$ розных падаткаў, што зьяўляецца прыблізна 73% нашых даходаў (з 510$).

Дагэтага трэба далічыць яшчэ падаткі ад нерухомасьці, ад жывёлаў, і шмат, шмат іншых (вельмі разнастайных) - што агулам дае нам каля 80%.

	цитата

калі б не дзяржава, ён бы гэтыя грошы плаціў нам – а так...

Высновы:

* дзяржава забірае ў нас 80% нашых заробкаў, што яна зь імі робіць - ня ведаю. То бок ведаю, але як бачу гэта ўсё, дык думаю: лепш бы ня ведаў, на здароўі зэканоміў бы.

* толькі 139$ з таго, што плоцім зыходзячы з нашых вылічэньняў, трапляе да прадпрымальнікаў, якія ствараюць для нас прадукты (а мы, праўда-ж, хочам набываць танныя й якасныя тавары?), ствараюць для нас мейсца працы (а мы, праўда-ж, хочам зарабляць як мага большыя грошы?)

А зараз пакідаю вас з вашымі разважаньнямі.

05.05.2007